აღსანიშნავია რომ, 2013 წელს შემოსავლების სამსახურის პრემიების ოდენობამ 59.4 ათასი ლარიდან 68.5 ათას ლარამდე შეადგინა, ეს კი თანამდებობრივი სარგოების 216%-227%-ს შეადგენს.

2013 წლის განმავლობაში, შრომის ანაზღაურების სახით ერთ პიროვნებაზე, ხელმძღვანელი პირებიდან გაცემული წლიური ჯამური თანხების ოდენობა კი 87.0 ათასი ლარიდან 98.7 ათას ლარამდეა.

რაც შეეხება 2012 წელს, შემოსავლების სამსახურის მიერ შრომის ანაზრაურებაზე 47,322.6 ათასი ლარის ხარჯი იქნა გაწეული. პრემიების ოდენობამ კი, 17,862.4 ათასი ლარი შეადგინა. ხელმძღვანელი პირებიდან შრომის ანაზღაურების სახით ერთ პიროვნებაზე გაცემული თანხების ჯამური ოდენობა კი 74.6 ათასი ლარიდან 106.7 ათას ლარამდე მერყეობს.  მათ შორის წლიური პრემიების ოდენობა 48.7 ათასი ლარიდან 78.5 ათას ლარამდე, რაც თანამდებობრივი სარგოების 188%-278% შეადგენს.

არაადეკვატური ოდენობის პრემიებს, საკანონმდებლო პრობლემას უკავშირებს ეკონომიკის ექსპერტი ლევან კალანდაძე. მისი განცხადებით როგორც წინა, ასევე ახალმა ხელისუფლებამაც საკანონმდებლო შესაძლებლობები საკუთარ კეთილდღეობას მოარგო.

„პრემირების სისტემა, ისევე როგორც წინა ხელისუფლების დროს ახალი ხელისუფლების დროსაც წარმოადგენს ხელისუფლების აქილევსის ქუსლს, რომელზეც პასუხი ვერც წინა ხელისუფლებამ და სამწუხაროდ ვერც ახალმა ხელისუფლებამ ვერ გასცა. არაადეკვატურია, როდესაც რეალური საშუალო ხელფასის ოდენობა რამდენჯერმე ჩამორჩება პრემიის ოდენობას. პრობლემა არის ის, რომ ეს არ არის კანონდარღვევა. როგორც წინა ასევე ახალმა ხელისუფლებამაც,  საკანონმდებლო შესაძლებლობები საკუთარი კეთილდღეობის კომფორტზე მოირგო. პრობლემა არის ის, რომ საკანონმდებლო რეგულირება არ ხდება, არ არის ჩამოყალიბებული საკანონმდებლო სისტემა, რომელიც პრემიების ადეკვატურობა - არაედეკვატურობის დონეს განსაზღვრავს. მაღალი თანამდებობის პირები პიროვნულად იღებენ გადაწყვეტილებას თუ ვინ რამდენი უნდა მიიღოს ანაზღაურება. აქედან გამომდინარე, გასაკვირი არ არის, რომ პრემიების ოდენობა ხშირად 50 ათასს ცდება. როდესაც ამას კანონი არ კრძალავს, ბუნებრივია ჩნდება ადამიანური ცდუნება იმის, რომ რაც შეიძლება მაღალი პრემია გამოიწეროს ამა თუ იმ თანამდებობის პირმა.  ამისთვის ადამიანებს ბუნებრივია ვერ დავსჯით და ვერც პასუხს მოვთხოვთ. პასუხი უნდა მოეთხოვოს სახელისუფლებო ვერტიკალს, რომელიც იძლევა ასეთი პრემიერბის გაცემის შესაძლებლობას.“ - ლევან კალანდაძე

სააგენტო აიპრესმა ამ თემასთან დაკავშირებით შეკითხვით შემოსავლების სამსახურის საზოგადოებასთან ურთიერთობის სამსახურსაც მიმართა. თუ რამ განაპირობა უწყებაში პრემიების მსგავსი მოცულობა, ამ კითხვაზე პასუხს ჩვენ მიღებისთანავე შემოგთავაზებთ.